پریس ریلیز
صرف مذہبی بنیادوں پراحمدیوں کے لئے الگ ووٹر لسٹ امتیازی سلوک اور مخلوط انتخابات کی روح کے خلاف ہے امتیازی سلوک کے خلاف اپنا احتجاج ریکارڈ کراتے ہوئے جماعت احمدیہ عام انتخابات 2013سے لاتعلقی کا اعلان کرتی ہے۔ :ترجمان جماعت احمدیہ
چناب نگرربوہ(پ ر)جماعت احمدیہ پاکستان کے ترجمان جناب سلیم الدین صاحب نے کہا ہے کہ الیکشن قوانین کے مطابق ووٹر کی اہلیت پاکستانی شہری ہے نہ کہ مذہب و ملت کی تفریق۔الیکشن کمیشن نے ووٹر کی رجسٹریشن کے لئے جو فارم جاری کیا ہے اس میں مذہب کا خانہ بطور خاص ڈالا گیا ۔اس ووٹر فارم کے تحت ووٹ کے اندراج کے لئے احمدیو ں کو آنحضرت ﷺ سے اعلان لا تعلقی کرنا پڑتا ہے اور کوئی احمدی اس کا تصور بھی نہیں کر سکتا۔مزید براں مخلوط انتخاب کے لئے ایک ہی جنرل ووٹر لسٹ بنائی جاتی ہے لیکن اس اصول کے برخلاف 2002اور 2008کے عام انتخابات میں احمدیوں کے لئے الگ ووٹر لسٹ بنانے کے لئے احکامات جاری ہوئے اسی تسلسل میں 2011میں انتخابی فہرستوں کی تصدیق کے لئے جو کتا بچہ ہدایات الیکشن کمیشن نے رجسٹریشن افسران اور دیگر عملے کے لئے شائع کیا اس کی شق12میں یہ الفاظ بطور خاص شامل کئے گئے۔
’’احمدیوں کے ووٹ ابتدائی انتخابی فہرست میں علیحدہ درج کئے جائیں گے اور رجسٹر کے صفحہ کے اوپر ’’احمدیوں کے لئے‘‘ لکھا جائے گا‘‘
ترجمان جماعت احمدیہ سلیم الدین صاحب نے کہا کہ اس حکمنامہ کے اجراء اور نفاذ کے نتیجہ میں ووٹر لسٹ کی کیفیت اب یہ قرار پائی ہے کہ ایک فہرست جس میں تمام پاکستانی شہری خواہ وہ مسلمان،مسیحی،یہودی،ہندو ،پارسی،سکھ ہوں یا دیگر مذاہب سے تعلق رکھتے ہوں ایک فہرست میں اکٹھے ہیں اور صرف احمدیوں کے لئے الگ ووٹر لسٹ بنائی جا ر ہی ہے جو مذہبی نفرت وتفریق اور تعصب اور امتیاز کی بدترین مثال ہے۔یہ تفریق بانی پاکستان حضرت قائد اعظم کے فرمودات،آئین پاکستان میں دئے گے حقوق،نیز مخلوط انتخابات کی حقیقی روح کے منافی ہونے کے ساتھ ساتھ انسانی حقوق کے عالمی اعلامیہ کی بھی شدیدخلاف ورزی ہے۔درحقیقت یہ محب وطن احمدیوں کو ملکی دھارے سے الگ کرنے اور کمزور اور سیاسی طور پر بے اثر بنانے کی کاوش ہے۔
ترجمان جماعت احمدیہ نے کہا کہ اس حوالے سے ہم نے حکومت کو تحریراًاور الیکشن کمیشن کو باضابطہ ملاقات کر کے اپنے موقف سے آگاہ کیا لیکن افسوس کہ اس سلسلے میں ابھی تک کوئی مثبت قدم نہیں اٹھایا گیا ۔دریں اثنا ء جماعت احمدیہ پاکستان اپنا پرزور احتجاج ریکارڈ کراتے ہوئے عام انتخابات 2013 سے لا تعلقی کا اعلان کرتی ہے۔###